Mu gihe cya Repubulika ya mbere: 1962-1973

Ibikorwa by’urugomo n’ubwicanyi byafashe indi ntera muri 1963 ubwo inyenzi zateraga ziturutse mu Bugesera. Hatangijwe mu gace k’Amayaga ibyo bise amarondo, bashishikariza abatutsi kwitabira amarondo kugirango binagaragare ko badashyigikiye inyenzi, nyamara umututsi wajyaga ku irondo ntiyagarukaga. Burugumestri Biseruka yanyuzagamo akarengera abatutsi nabo bakibwiriza bakamugorera inka. Bacye cyane nibo bari bazi ko yahinduje ubwoko; abo bahuje ishyaka kandi nabo akabereka ko atari ikigwari, akababwira ko inyenzi zashize abasigaye bose muri Ntongwe ari Parmehutu, ndetse yiha ikivugo cya Mitumbitabarika kandi yibeshyera kugirango bamwemere; kandi koko muri 1963 nta bwicanyi ku mugaragaro bwabaye ku Mayaga uretse abarigiswaga ku marondo.

Kayibanda Grégoire wari Perezida muri iki gihe yakomeje kugabira abaturutse mu Marangara na Ndiza akaba aribo usanga mu butegetsi bwa Perefegitura, bwa Komini ndetse n’Abajyanama mu mirenge, izo nizo nzego zariho icyo gihe. Perefegitura Gitarama niyo Ntongwe ibarirwamo.

Abanyamayaga ntibigeze bagirirwa ikizere, ku Mayaga hafatwaga nk’indiri ya UNAR; n’abahutu baho byabaye ngombwa ko babazanamo abandi barushaho kwizerwa, cyane cyane urubyiruko rw’abahutu rwimuwe mu tundi duce twa Gitarama ndetse n’ahandi, bagabirwa amasambu y’abatutsi ku Mayaga. Kugirango babatinyure, abategetsi bo hejuru bafashe nabo amasambu ku Mayaga barahubaka batanga amakamyo yo kwimura abo basore, babaha n’akazi ko gukora mu masambu yabo.  Ingero zifatika: Prezida Grégoire Kayibanda ubwe yafashe amasambu ku ka Kirenzi muri Ntongwe, afata n’indi mu Ijenda muri Mugina.

Max Niyonzima afata i Mbuye kwa Nyirakigwene; Minani Froduard afata i Mukinga; Rwasibo Yohani Baptista afata i Kibanda; Omar Kanakuze atura i Gisali.

Ikiswe” Groupement” y’i Mukinga bacyubakiyemo urubyiruko rw’abahutu ngo batinyuke bature ku Mayaga kandi bimenyereze abatutsi baho.

Iyo politiki yari igamije gutwara amasambu y’abatutsi no kubakenesha, gusiba amariba y’inka zabo hagahingwa ibijumba, bityo babona nta kigenda bakaba banakwimuka. Nta busabane, nta gushyikirana byigeze birangwa muri abo bimukira ba politiki y’ivangura n’abo basanze ku Mayaga.

Muri 1972-1973 Leta ya Kayibanda na Parmehutu nk’ishyaka bari bifitiye ibibazo by’urudaca, gusubiranamo, kurwanira imbehe n’abakiga; umuti babonye uba uwo kwibutsa ko umwanzi wabo ari umwe: umututsi bityo kurangarira ibindi bikaba byamuha icyuho. Ibyo nibyo byavuyemo kwirukana abatutsi mu mashuri no mu kazi, gutwikira abatutsi byarabaye ku Mayaga. Abatutsi rero babaye ibitambo by’ubwumvikane bucye bw’Abaparmehutu

Igihe cya Repubulika ya kabiri: Nyakanga 1973 - Mata 1994

Aha hari ku Ngoma ya Prezida Habyarimana Yuvenali. Mu nzego za Leta, ubutegetsi bwari bushingiye kuri Prefegitura, Suprefegitura, Komini, Segiteri na Selire. Habyarimana afata ubutegetsi, Prefe wa Gitarama yari Karuta T., aho Suprefegitura zigiriyeho, Kinazi yari muri S/Prefegitura ya Ruhango, Komini Ntongwe, Segiteri Kinazi.

Kubera itotezwa n’imeneshwa byanabyaye ubuhunzi, abatutsi bakorewe muri 1973, ingoma ya Habyarimana yakiriwe neza n’abatutsi kubera akarimi keza n’imvugo y’ikinyoma byaranze Habyarimana, abeshya ko atanze ihumure, ko abatutsi ari abanyarwanda nk’abandi. Yamagana ubwicanyi bwakozwe muri 1973 nubwo we ubwe n’abo bafatanije gukora Coup d’état bari babifitemo uruhare. Yego Kayibanda yari afite uwo mugambi kandi ntiyigeze yihishira, umugambi wo gushishikariza urubyiruko gukomeza « révolution » ngo barangiza ibyananiye abakuru. Mu gitabo cye Antoine Mugesera avuga iyirukanwa ry’abatutsi mu kazi no mu mashuri agira ati :

« Uwari ku isonga ni Prezida Kayibanda ubwe. Ndetse F.Reyntjens avuga ko abari bahagarariye abanyeshuri bo mu Byimana n’Ishyogwe ho mu Marangara bakoreraga inama kwa Kayibanda nyirizina mu rugo rwe rw’i Kavumu, i Gitarama. Hafi aho kandi niho hari ikicaro gikuru cya MDR-Parmehutu, niho hacuriwe umugambi wo kwirukana abatutsi. » (p.225)

Uguhinduka kw’ingoma yari imaze imyaka irenga 13 umututsi atotezwa, atungwa agatoki, ari mpamvu y’ibyago byose bigwiririye u Rwanda ; birumvikana ko ihinduka ry’iyo ngoma byagombaga kuba impamvu y’ibyishimo abantu bakiruhutsa. Ni nayo mpamvu abanyamayaga bakwirakwije impuha bavuga ko Habyarimana mu by’ukuri atari umuhutu ko umwami Rwabugiri yamubyaranye n’umuhutukazi wo mu Kingongo. Birumvikana ko ari ikinyoma gikabije unarebye imyaka ye n’igihe Rwabugiri yatabarukiye.  Ntibari bazi ikibategereje ku ngoma ye. Ingoma ye yaranzwe n’ivangura rikomeye, rikoranye ubuhanga n’ubugome : ituzwa ku Mayaga ry’abahutu baturutse i Bufundu, Bunyambiriri, Kibuye n’ahandi bafite ubunararibonye mu kwica abatutsi nkuko abo ba nya Gikongoro babikoze muri 1963.

Bibwiye ko Parmehutu ivuyeho, nyamara idéologie yayo niyo yakomeje kuyobora politiki ya Repubulika ya kabiri kugeza kuri Jenoside yakorewe Abatutsi muri 1994. Politiki yari iriho ni iy’ivangura rikorerwa abatutsi mu nzego zose, mu kazi no mu mashuri. Ku Mayaga iyo politiki y’ivangura yatumye bakanguka yatumye aba Nyamayaga bahindura imibereho, bahindura imirimo bari basanwe bamenyereye. Nguko uko ku Mayaga batangiye ubuhinzi bwa kijyambere, bahinga imyumbati ku buryo bwa kijyambere, bahinga urutoki ndetse n’umuceli ndetse bagana n’ubucuruzi. Agace k’amayaga ni agace kera cyane imyaka yose ibyo rero byatumye batera imbere. Iyo mirimo kandi yatumye nabo batanga akazi, abapagasi baturutse hirya no hino mu tundi duce tw’igihugu, cyane cyane abanya Gikongoro berekeza ku Mayaga. Utarapfuye rero ntiyabaye umutindi kandi n’imibanire yarongeye iragaruka buhoro buhoro.

Mu gihe cya Jenoside 1994

Nubwo ubwicanyi ndengakamere bwabaye mu ijoro ryo kuwa 21 rishyira uwa 22 mata 1994, abanyamayaga bavuga ko guhera muri 1993 ibikorwa bya Jenoside ariho byatangiye. Abateguye Jenoside yakorewe abatutsi mu Rwanda muri 1994, bari barashyize inkambi z’impunzi z’Abarundi ahitwa Nyagahama muri Ntongwe. Aho i Nyagahama nta mututsi wahacaga ngo abeho. Ikindi gikorwa cyagaragazaga umugambi wo kuzamara abatutsi, uwajyaga kubikuza amafaranga ye muri banki kandi ayafite barayamwimaga. Guhera muri 1993 umututsi ntiyabikuzaga, wanashaka amakuru kuri konti yawe bakakugaragariza ayo wabikuje ayo wabikije ntuyabone.

Nyuma y’ihanuka ry’indege ya Habyarimana byabaye guhuhura. Mu gitondo cy’itariki ya 7/4/1994 abantu bahungiye ku biro bya Komini Ntongwe. Aho ku biro bya Komini, abatutsi bihagazeho uko bashoboye bakumira ibitero byinshi byazaga bibasanga,  abategetsi baho bacura umugambi wo kubavana yo babagira inama yo kujya ku biro bya S/Prefegitura Ruhango byari byubatse nabyo i Kinazi, babamanura i Nyamakumba basanga impunzi z’Abarundi zibategereje mu itaba rihari ziri kumwe n’interahamwe zibamarira aho.

Ku Rutabo ku mashuri, uwari Diregiteri w’ikigo Nsabimana Jacques, akaba anahagarariye CDR mu rwego rw’umurenge, yari yaracukuje ibyobo byinshi kandi birebire, aba aribyo barundamo imirambo. Uwo Jacques ninawe wagiye kuzana interahamwe z’i Bugesera ziza kubafasha. Abandi bayoboye ibitero ni Sous Prefet Placide Koroni ari nawe washishikarizaga abantu kuva ku mashuri ngo bamusange kuri S/Prefegitura niho umutekano wabo urindirwa. Hari kandi Kagaba Karori wari Burugumestri wa Ntongwe, Ndahimana w’umucuruzi, Hodali Job w’umucuruzi n’abari ba Konseye bose.

I Kinazi haguye abantu barenga ibihumbi mirongo itandatu, uretse abanya Ntongwe ubwabo bari bahungiye ku biro bya Komini, hari hanahungiye abatutsi bavuye i Bugesera, abavuye ku Mugina, n’abavuye muri Muyira. Abantu babaye benshi kandi bakomeje kugaragaza ubutwari barwana n’interahamwe, S/Prefet Koroni nibwo yize amayeri yo kubazana ku biro bya S/Prefegitura aho Abajandurume n’abapolisi ba Komini bari biteguye ninabo bari inyuma y’impunzi zAbarundi n’interahamwe. Abarundi bamaze abantu hirya no hino aho inkambi zabo zari, kandi kugeza ubu ntawe urakurikiranwa kubera icyo cyaha ndengakamere (Reba ku mugereka urutonde rw’Abarundi bakoze Jenoside mu Rwanda).

Inkotanyi zageze i Kinazi kuwa 26/5/1994. Zakomereje I Kabgayi kuwa 2/6/94 aribwo abicanyi na Leta yabo yabaga i Gitarama bamenenganye.